Hududlarning barqaror va muvozanatli rivojlanishini ta’minlashga qaratilgan islohotlar izchil amalga oshirilayotgan sharoitda, hududlar salohiyatini samarali ochib berish va ularning uyg‘un rivojlanishini ta’minlashga xizmat qiluvchi yagona fazoviy rejalashtirish tizimini shakllantirish alohida ahamiyat kasb etmoqda.
Shu munosabat bilan Strategik rivojlanish va islohotlar agentligida Jahon banki missiyasi bilan uchrashuv bo‘lib o‘tdi. Mazkur missiya Milliy fazoviy rivojlanish strategiyasi va siyosat yo‘nalishlarini (NSVP) ishlab chiqish bo‘yicha texnik ko‘mak doirasida tashkil etildi.
Muzokaralar davomida tomonlar NSVPni ishlab chiqishning asosiy jihatlarini, jumladan, metodologiyasi, qamrovi va kutilayotgan natijalarini, shuningdek, hududlarning muvozanatli rivojlanishi, barqaror urbanizatsiya va iqtisodiy raqobatbardoshlikni ta’minlashga qaratilgan ustuvor davlat siyosati yo‘nalishlarini muhokama qildilar.
Alohida e’tibor davlat organlari o‘rtasidagi muvofiqlashtirish masalalari, institutsional mexanizmlarni shakllantirish va strategiyani amalga oshirish bo‘yicha “yo‘l xaritasi”ni ishlab chiqishga qaratildi. Shuningdek, asoslangan qarorlar qabul qilish hamda hududiy rejalashtirish samaradorligini oshirish uchun zarur bo‘lgan mavjud statistik va tahliliy ma’lumotlarni tahlil qilish masalalari ko‘rib chiqildi.
Uchrashuv davomida Jahon banki vakillariga O‘zbekistonda strategik rejalashtirish sohasida amalga oshirilayotgan islohotlar, jumladan, rivojlanishni boshqarishning yagona kompleks tizimini joriy etish hamda monitoring va muvofiqlashtirishning raqamli vositalari haqida ma’lumot berildi.
Uchrashuv yakunida tomonlar hamkorlikni yanada chuqurlashtirishga o‘zaro qiziqish bildirdilar hamda mamlakat hududlarining barqaror, inklyuziv va uzoq muddatli rivojlanishini ta’minlashga qaratilgan zamonaviy fazoviy rivojlanish tizimini shakllantirish bo‘yicha birgalikdagi ishlarni davom ettirishga tayyor ekanliklarini ta’kidladilar.
