O‘zbekiston Respublikasi Ichki ishlar vazirligi “Sifatli davlat boshqaruvi” dasturi (Government Quality Award) doirasida o‘tkazilgan baholash yakunlariga ko‘ra, “Davlat xizmatlarini ko‘rsatish bo‘yicha namunali davlat organi” nominatsiyasi g‘olibi deb topildi. Ushbu e’tirof vazirlikda fuqarolar xavfsizligini ta’minlash, qonun ustuvorligini mustahkamlash hamda davlat xizmatlari sifatini oshirishga qaratilgan tizimli institutsional islohotlar samarasi sifatida baholanmoqda.
Baholash qanday o‘tkazildi?
Vazirlik faoliyati uchta asosiy mezonlar guruhi bo‘yicha baholandi: strategik maqsadlarni amalga oshirish, asosiy funksiyalar va innovatsiyalar, shuningdek, integratsiyalashgan ta’minlovchi omillar.
Baholovchi ekspertlar vazirlikning strategik rivojlanish yo‘nalishlari, operatsion faoliyat samaradorligi, ko‘rsatilayotgan xizmatlar sifati, kadrlarni boshqarish tizimi, davlat boshqaruvi mexanizmlari hamda erishilgan natijalarning barqarorligini chuqur tahlil qildilar.
Vazirlik faoliyati “O‘zbekiston – 2030” strategiyasi maqsadlariga muvofiqligi nuqtai nazaridan ko‘rib chiqildi hamda davlat boshqaruvining ilg‘or xalqaro tajribalari bilan taqqoslandi. Mahalliy va xalqaro ekspertlarning ishtiroki natijalarning mustaqilligi hamda xolisligini ta’minladi.
Asosiy ko‘rsatkichlar va yutuqlar
Ichki ishlar vazirligi faoliyati natijalari jamoat xavfsizligini ta’minlash, raqamlashtirish va davlat xizmatlari sifatini oshirish borasida barqaror o‘sish kuzatilayotganini tasdiqladi.
Jamoat xavfsizligi va huquqbuzarliklar profilaktikasi
- Har 100 ming aholiga to‘g‘ri keladigan jinoyatlar soni 2023-yildagi 68,2 ko‘rsatkichdan 2025-yilda 40,9 taga tushdi, oldini olish mumkin bo‘lgan jinoyatlar esa 31,5 foizga qisqardi.
- Mahalla darajasida joriy etilgan profilaktika modeli mamlakatdagi barcha 9 008 ta mahallani qamrab oldi. Unda 10 mingdan ortiq profilaktika inspektorlari ishtirok etib, qariyb 1,37 million ehtimoliy huquqbuzarliklarning oldi olindi.
- Mahallalarning 44,8 foizida umuman jinoyat sodir etilmagan. Shu bilan birga, 8 milliondan ortiq xonadon bilan tizimli hamkorlik yo‘lga qo‘yilgan.
- Ayollar o‘rtasidagi jinoyatchilik 3,5 barobar, voyaga yetmaganlar o‘rtasidagi jinoyatchilik esa 25,3 foizga kamaydi.
- Aholi sonining o‘sishiga qaramay, yo‘l-transport hodisalari va ular oqibatida halok bo‘lganlar soni qisqartirildi.
Davlat xizmatlari va fuqarolar murojaatlari bilan ishlash
- Vazirlik tomonidan qariyb 60 turdagi davlat xizmatlari ko‘rsatilmoqda. Ularning 95 foizini 2026-yilda to‘liq raqamlashtirish maqsad qilib belgilangan. 2024–2025-yillarda xizmatlar soni 40 foizga oshdi.
- 2023–2025-yillar davomida fuqarolardan kelib tushgan 1,12 milliondan ortiq murojaat ko‘rib chiqilib, ularning 100 foizi bo‘yicha yechim ta’minlandi.
- Davlat xizmatlari raqamli platformalar, jumladan my.gov.uz portali orqali ko‘rsatilmoqda va har bir xizmat bo‘yicha ochiq hamda shaffof ma’lumotlar taqdim etilgan.
Huquqni muhofaza qilish faoliyati va raqamlashtirish
- 2025-yilda 148 mingdan ortiq ma’muriy ish masofadan turib ko‘rib chiqildi. Elektron ma’lumot almashinuvi hajmi 2023-yildagi 512 874 tadan 2025-yilda 1 444 759 taga yetdi.
- “Xavfsiz shahar” dasturi doirasida 20 dan ortiq vazirlik va idoralarning 72 ta ma’lumotlar bazasi yagona tizimga integratsiya qilinib, 14 ta dispetcherlik markazi orqali markazlashtirilgan monitoring yo‘lga qo‘yilgan.
- Vazirlikning NIS.egov.uz reytingidagi o‘rni 2023-yildagi 31-pog‘onadan 2025-yilda 6-o‘ringa ko‘tarildi.
Xalqaro e’tirof va reabilitatsiya ishlari
- Qonun ustuvorligi indeksida mamlakat 81-o‘ringa ko‘tarildi, xavfsizlikni his etish indeksi bo‘yicha dunyoda 1-o‘rinni egalladi hamda siyosiy barqarorlik reytingida 22 pog‘onaga (139-o‘rindan 117-o‘ringa) yaxshilanish qayd etildi.
- 11 mingdan ortiq ma’rifiy va 12 mingdan ortiq psixologik tadbirlar tashkil etildi. 1 095 ta bo‘sh ish o‘rinlari yarmarkasi orqali 4 469 nafar fuqaroning bandligi ta’minlandi.
Takomillashtirish bo‘yicha tavsiyalar
Erishilgan yutuqlar bilan bir qatorda, ekspertlar guruhi vazirlik faoliyatining samaradorligini yanada oshirishga qaratilgan bir qator tavsiyalarni ham ilgari surdi:
- Kiberjinoyatchilik, migratsiya jarayonlari va texnologik xavflar kabi yangi tahdidlarni oldindan prognoz qilish uchun strategik foresight amaliyotini rivojlantirish.
- Strategik maqsadlar bilan milliy natijalar o‘rtasidagi bog‘liqlikni kuchaytirish maqsadida aniq boshlang‘ich ko‘rsatkichlar, maqsadli indikatorlar va natijaga yo‘naltirilgan baholash mezonlarini joriy etish.
- Fuqarolar murojaatlari, migratsiya tizimlari va sotsiologik tadqiqotlar ma’lumotlarini yagona strategik tahlil platformasiga integratsiya qilish orqali tendensiyalarni aniqlash hamda boshqaruv qarorlarini qabul qilish sifatini oshirish.
- ISO 55001 standartlari asosida aktivlarning hayotiy siklini boshqarish tizimini joriy etish, risklarni boshqarish va faoliyat uzluksizligini ta’minlash mexanizmlarini yanada mustahkamlash shular jumlasidan.
