2026 yil 22 may kuni bo‘lib o‘tgan tantanali marosimda O‘zbekiston Respublikasi Prezidenti tomonidan «Sifatli davlat boshqaruvi» (Government Quality Award) dasturi g‘oliblari e’tirof etildi. «Inson resurslari bo‘yicha namunali xodim» nominatsiyasida Adliya vazirligining bo‘lim boshlig‘i Mirsaid Rahmatov g‘olib deb topildi.
Baholash qanday o‘tdi?
Nomzod faoliyati yettita yo‘nalish bo‘yicha baholandi: natijadorlik va kelajakka yo‘naltirilganlik, innovatsion fikrlash, o‘qish va yondashuvlarni yangilash, tashabbuskorlik, pozitivlik hamda liderlik fazilatlari. Har bir mezon bo‘yicha ekspertlar ish faoliyatining o‘lchanadigan natijalari, amalga oshirilgan tashabbuslar va ularning idora samaradorligiga ta’sirini tahlil qildi, shuningdek, kelgusidagi rivojlanish uchun tavsiyalar ishlab chiqdi.
Asosiy ko‘rsatkichlar va yutuqlar
Barqaror yuqori samaradorlik. Shaxsiy samaradorlik ko‘rsatkichi 2024 yildagi 99,91 foizdan 2025 yilda 100 foizga yetdi. Xodimlar kompetensiyalarini rivojlantirish indeksi rejalashtirilgan 97 foiz ko‘rsatkichga erishdi. Yangi ishga qabul qilingan xodimlar ulushi 9 foizdan 15 foizgacha oshdi, kadrlar qo‘nimsizligi esa 3,8 foizdan 1,7 foizgacha kamaydi. Bu jamoaning barqarorligi va kadrlarni saqlab qolish strategiyasining samaradorligini namoyon etadi.
Karyera o‘sishining tizimli modeli. 2025 yil 31 oktabrdagi 406-um-son buyruq asosida «tuman – viloyat – respublika» tamoyiliga asoslangan shaffof karyera o‘sishi modeli joriy etildi. Unda oddiy lavozimlar uchun 2 yil, rahbarlik lavozimlari uchun 4,5 yil, tuman darajasidan viloyat darajasiga o‘tish uchun esa 3 yillik aniq muddatlar belgilandi. Shuningdek, «TOP-50» kadrlar zaxirasi shakllantirilib, uning 52 foizini yosh mutaxassislar tashkil etdi.
Byurokratiyani kamaytirish. O‘zbekiston va BAA hamkorligidagi «Nol byurokratiya» tashabbusi asosida ta’tillarni rasmiylashtirishning to‘liq avtomatlashtirilgan tizimi joriy etildi. Natijada jarayon bosqichlari 16 tadan 4 tagacha qisqarib, 75 foizga kamaytirildi. Tizimdan foydalanish darajasi 2024 yilda 94 foizni, 2025 yilda esa 95 foizni tashkil qildi.
Milliy kadrlar salohiyatini rivojlantirishga hissa. So‘nggi uch yil davomida vazirlikning 20 nafar xodimi O‘zbekiston Respublikasi Prezidenti Administratsiyasi va Vazirlar Mahkamasiga ishga o‘tdi (2023 yilda — 8 nafar, 2024 yilda — 5 nafar, 2025 yilda — 7 nafar). «Adliya» huquqshunos talabalar klubi orqali 90 nafar talaba jalb qilinib, bu rejalashtirilgan 60 nafarlik ko‘rsatkichdan 50 foizga yuqori natija bo‘ldi. Xodimlar barqarorligi indeksi 97,4 foizga yetkazildi.
Kadrlar sohasining raqamli transformatsiyasi. «MinJust HR» axborot tizimi ishga tushirilib, u hrm.gov.uz platformasi bilan integratsiya qilindi. Bu orqali yillik taxminan 4 tonna qog‘oz sarfi bartaraf etildi, kunlik ish vaqti o‘rtacha 3 soatga tejaldi hamda yiliga qariyb 600 million so‘m mablag‘ iqtisod qilinishi ta’minlandi.
Rotatsiya va xavflarni kamaytirish. Kadrlar rotatsiyasining tizimli mexanizmi joriy etildi: rahbarlik lavozimlari uchun — 5 yil, tuman bo‘g‘ini rahbarlari uchun — 4 yil. Ushbu tizim 2022 yilda 816 nafar, 2023 yilda 1 010 nafar, 2024 yilda 794 nafar va 2025 yilda 750 nafar xodimni qamrab oldi. Natijada kadrlar qo‘nimsizligi 2022 yildagi 15 foizdan 2025 yilda 5 foizgacha pasaydi.
Benchmarking va kompetensiyalarni baholash. BAA, Koreya Respublikasi va Niderlandiyaning ilg‘or tajribasi asosida «360 daraja» usuli bo‘yicha kompetensiyalarni baholash tizimi joriy etildi. Unga ko‘ra, 173 nafar xodim samaradorlik toifalari bo‘yicha baholandi. Shuningdek, gibrid ish shakllari va raqamlashtirishga bog‘langan rag‘batlantirish mexanizmlari amaliyotga tatbiq etilib, raqamlashtirish darajasi 80 foizga yetkazildi.
Strategiya va standartlar. 2025–2026 yillarga mo‘ljallangan HR-strategiya ishlab chiqildi. U 4 ta yo‘nalish, 22 ta vazifa va 65 ta amalga oshirish mexanizmini o‘z ichiga olib, ijro darajasi 95 foizni tashkil qildi. Strategiya xalqaro ISO 30400:2022 standarti talablari bilan uyg‘unlashtirildi.
O‘qitish va rivojlanish. Nomzod 2022–2025 yillar davomida 5 tadan ortiq o‘quv dasturlari va xalqaro konferensiyalarda ishtirok etdi. Jumladan, 2025 yilgi «Tashkent Law Spring» xalqaro huquq forumi qatnashchisi bo‘ldi, BAA, Niderlandiya, Koreya Respublikasi va Latviyaga xizmat safarlarini amalga oshirdi. Latviya tajribasini o‘rganish natijasida yangi xodimlarni moslashtirishning tizimlashtirilgan mexanizmi ishlab chiqildi (2023 yil 19 iyundagi 149-um-son buyruq). U 2015 yilda Toshkent davlat yuridik instituti magistraturasini tamomlagan bo‘lib, hozirda PhD doktoranturasida tahsil olmoqda.
Yaxshi mehnat muhiti va xodimlar farovonligi. Ish joyidagi baxt indeksi 4,4 balldan 4,7 ballgacha o‘sdi. 2 938 nafar ayol xodim tibbiy ko‘rikdan o‘tkazildi, 158 nafar uchun kardiologik tekshiruvlar tashkil etildi. Sog‘lom turmush tarzi va ovqatlanish bo‘yicha ma’rifiy tadbirlar, shuningdek, psixologik qo‘llab-quvvatlash dasturlari amalga oshirildi. Xodimlar jalb etilganlik darajasini baholash so‘rovlarida 7 500 nafardan ortiq xodim ishtirok etdi. 2021–2025 yillar davomida Mirsaid Rahmatov 5 ta idoraviy mukofot bilan taqdirlangan bo‘lib, ular orasida eng yuqori mukofot — «Excellence in Justice» ko‘krak nishoni (2025 yil) ham mavjud.
Takomillashtirish bo‘yicha tavsiyalar
Ekspertlar komissiyasi kelgusidagi rivojlanish uchun bir qator yo‘nalishlarni belgiladi. Joriy etilgan tashabbuslarning idora samaradorligiga ta’sirini amaliy misollar, avvalgi natijalar yoki o‘xshash institutlar bilan taqqoslash orqali yanada aniq namoyon etish tavsiya qilindi.
Shuningdek, milliy va sohaviy ustuvor vazifalarga mos keladigan, o‘lchanadigan ko‘rsatkichlarga ega o‘rta va uzoq muddatli rejalarni ishlab chiqish hamda yangi tendensiyalar va chaqiriqlarni oldindan aniqlash uchun prognozlash vositalaridan faolroq foydalanish maqsadga muvofiqligi ta’kidlandi.
Bundan tashqari, o‘z innovatsion yechimlarini ilmiy maqolalar, konferensiyalar va bilim almashish platformalari orqali hujjatlashtirish va ommalashtirish, shuningdek, tashabbuslarning uzoq muddatli samaradorligi, kengaytirish imkoniyati va barqarorligini baholaydigan kompleks tizimni shakllantirish tavsiya etildi.
