Nurafshon shahrida boʻlib oʻtgan Xalq deputatlari kengashining navbatdagi sessiyasida Toshkent viloyatini 2030-yilgacha rivojlantirish strategiyasi loyihasi koʻrib chiqildi. Bu hujjat “Oʻzbekiston – 2030” strategiyasining mantiqiy bir qismi boʻlib, unda Toshkent viloyati boʻyicha 70 dan ortiq maqsadlar belgilangan.
Mamlakatimizda imkoniyatlar ham, aholining talabi ham oshib boryapti. Kelgusida rivojlanish surʼatlarini yanada oshirish va uni odamlar hayotida aks ettirish zarur.
Toshkent viloyati ham sanoat, ham turizm, ham qishloq xoʻjaligi kabi iqtisodiyotdagi yetakchi sohalar boʻyicha juda katta imkoniyatlarga ega. Transport va logistika jihatidan esa eng qulay hudud – uchta qoʻshni davlat bilan chegaradosh, mamlakatimizning sharqi va gʻarbini bogʻlab turuvchi asosiy “arteriya” shu yerdan oʻtgan. Shuningdek, poytaxtimiz bilan yaqinlik bu viloyat uchun katta bozor degani.
Strategik rivojlanish va islohotlar agentligi tomonidan strategiyani tayyorlashda ana shu jihatlarga – viloyatning ustun tomonlaridan foydalanishga alohida eʼtibor qaratilgan.
Bu strategiyaning bosh maqsadi – 2030-yilgacha Toshkent viloyatini ilm-fan, innovatsiyalar, raqamli iqtisodiyot, moliya va turizm xizmatlari hududi sifatida rivojlantirish. Aholi jon boshiga iqtisodiy faollikni va mehnat unumdorligini oshirish, koʻproq ish oʻrinlari yaratishdan iborat.
Bunga erishish uchun 7 ta asosiy yoʻnalish belgilangan. Bular – iqtisodiy rivojlanish va aholi farovonligi, eksport va investitsiyalar, kambagʻallikka barham berish va ijtimoiy himoya, inson kapitali, infratuzilma va “aqlli shahar”, ekologiya va “yashil iqtisodiyot”, turizm va tadbirkorlik.
Jumladan, yalpi hududiy mahsulot hajmi 2030-yilga qadar hududiy 28,3 milliard AQSH dollariga, aholi jon boshiga 8,3 ming dollarga yetkazilishi koʻzda tutilgan. Ishsizlikni kamaytirish, mutlaq kambagʻallikka toʻliq barham berish vazifasi qoʻyilgan.
Maktabgacha taʼlim qamrovi 76 foizga, oliy taʼlim qamrovi 85 foizgacha oshiriladi. Aholining oʻrtacha umrini 75 yoshdan 78 yoshgacha uzaytirish choralari koʻriladi. Har yili 12,8 ming xonadonli uy-joy barpo etiladi, “Yangi Oʻzbekiston” massivilarini 8 taga yetkaziladi. 4,8 ming kilometr avtomobil yoʻllari taʼmirlanadi.
Asosiy maqsad besh yillik rivojlanishni har bir tuman, har bir oila hayotiga olib kirishdir. Shuning uchun ham strategiyada aniq maqsadlar, ularga erishish mexanizmlari, moliyalashtirish manbalari va masʼullar belgilab qoʻyilgan.
Eng muhimi, natijalar muntazam monitoring qilib boriladi. Bunda xalq deputatlari va jamoatchilik faollaridan katta masʼuliyat talab etiladi. Strategiya ijrosining borishi har chorakda doimiy komissiyalar kesimida oʻrganib boriladi. 2028-yilda oraliq baholash oʻtkaziladi.
Mahalliy byudjet parametrlarini Strategiya maqsadlari bilan uzviy bogʻliq holda tasdiqlash va mablagʻlar sarfi shaffofligi ustidan jamoatchilik nazorati oʻrnatiladi.
Umuman olganda, hudud strategiyasi yangi ish oʻrinlari, zamonaviy kasblar, sifatli taʼlim, qulay infratuzilma, rivojlangan turizm, zamonaviy sanoat va farovon oilalar sari yoʻl xaritasi boʻladi. Zero, undagi bosh gʻoya shunchaki raqamlar emas, xalqimizning hayoti va farovonligidir.
